ஞாபகங்கள்

பள்ளி பருவத்தில் பிரிந்த தோழனை
நடு சாலையில் அழுது வாங்கிய பொம்மை
விளையாட்டில் நண்பனிடம் போட்ட சண்டை
தந்தை கரம் பிடித்து நடந்த நடை
நினைத்தால் நரம்புகளும்
நவரச கீதம் பாடும் ஞாபகங்கள் !

பகைமை தூண்டிவிடம் நினைவுகள்
காமத்திற்காக காதலிக்கும் காதலர்கள்
கருணை மறந்த கள்வர்கள்
கர்மத்தை செய்து காலத்தை ஓட்டுபவர்கள்
நினைத்தால்
நித்திரை கெடுக்கும் ஞாபகங்கள் !

மறதியை பரிசளித்த இறைவனே
தேவையில்லாவற்றை அழித்து விட்டு
தேவையானவற்றை நினைவுப் படுத்த....
கணிப்பொறிப் போல்
மனதை படைத்தால் என்ன ?

தேவையில்லாத ஞாபகங்களின்
உன் ஞாபகத்தை மறந்தேன் !
பல மதக்குழப்பத்தில்
நீயும் என் ஞாபகத்தை மறந்தாய் !

மறதிலும் இறைவன்
ஞாபகமாய் சொன்னான் -

“மறதி மனிதனுக்கு மட்டுமல்ல
மகேஸ்வரனுக்கும் பொதுவென்று”

அறிமுகம்

கருவில் வந்த குழந்தைக்கு
அன்னையின் ஸ்பரிசம் அறிமுகம் !
உறவினர்கள் தீண்டலில்
குழந்தைக்கு கண்ணீர் அறிமுகம் !
கண்ணீர் சிந்தி செல்லும் போது
பள்ளிக்கூடம் அறிமுகம் !
விளையாட்டில் நண்பர்களிடம்
போடும் சண்டை அறிமுகம் !

கன்னியிடத்தில் வரும்
முதல் காதல் அறிமுகம் !
ஜனனம் வாழ்க்கையின்
தொடக்கத்தின் அறிமுகம் !
மரணம் வாழ்க்கையின்
முடிவில் அறிமுகம் !
மற்ற அறிமுகங்கள் வரும் நாட்களில் ...
பழகிய முகம் !

முதல் தேர்வு
முதல் போட்டி
முதல் காதல்
முதல் முயற்சி
அனைத்திலும் வென்றவர்
வரலாறு படைப்பதில்லை !

தோல்வியின் அறிமுகத்திற்கு அஞ்சினால்
வெற்றியின் அறிமுகம் கிட்டாது !
வெற்றி கிட்டும் வரை
உன் பிறப்புக்கு மதிப்பு கிடையாது !

மரணத்திற்கு நீ அறிமுகம் ஆகும் முன்பு
உலகிற்கு அறிமுகம் ஆகிவிடு !

உலகிற்கு நீ அறிமுகம் ஆகும் போது
உன் வெற்றி மட்டுல்ல ...
தோல்விகளுக்கும் வரலாறு ஆகும் !

ஓவ்வொரு தோல்வியில் கற்றுக்கொள் !
வெற்றிக்கு அறிமுகம் ஆகும் வரை
தோல்வியை ஏற்றுக்கொள் !

கவிதையின் எதிரி

‘கவிதை’
என்பது பொய்யாம்
ஆதலால், கவிதைக்கு
உண்மை தான் எதிரி !

பொய்யெல்லாம்
உண்மையாகிவிட்டால் !
எழுதிய மையெல்லாம்
உண்மையாகிவிடும் !

காற்றோடு செல்லும் உடல்
கவிதை பாடும் குயில் !
மதுவின் மயக்கம்
மாதுவின் ஸ்பரிசம் !!

மரணத்தின் நடுக்கம்
மரணப்படுக்கை உறக்கம் !
பள்ளியில் வந்த முதல் சினேகிதம்
கல்லூரிக் காதல் கொடுத்த இன்பம் !!

முதல் முத்தம்.....
முல்லை தரும் சுகந்தம் !
தோழியுடன் நடைப்பயணம்
தோழர்களுடன் பேரூந்துப் பயணம் !!

மூன்றாம் பிறையாக
சித்தரிக்க படும் சூரியன் !
முத்திரை பொழுதில்
முழு நிலவாய் சந்திரன் !!

அழிகில்லாப் பதுமையை
அவதாரம் என்று அழைப்பது !
அவளின் கோழிக் கிறுக்கல்களை
கவிதை என்று வர்ணிப்பது !!

மரணத்தின் பின் வாழ வைப்பது
பிறக்கும் முன்பே உருவத்தை வடிவமைப்பது !

எல்லாம் சாத்தியம் கவிதையில்...
ஆனால்,
இந்த உண்மை
எட்டவில்லை சில பேர் மனதில் !

கற்பனைகள்
கவிதைக்குத் தீனிப்போடும் !
ஏதார்தங்கள்
எதிர்மறையாக சண்டைப்போடும் !

உண்மை கவிதைக்கு
தடை விதிக்கவில்லை !
உண்மையை உணர்ந்தவர்கள்
கவிதைப் பொய் என்றே கூறுகிறார்கள் !

கனவுகளே கவிதைக்கு விதையானது
கற்பனையே கவிதையின் எழுத்தானது !
விற்பனை ஆகும் போது காசானது
உண்மையே கவிதைக்கு எதிரியானது !!

அயல்நாட்டு மணவாளன்

இந்தியாவில் நதிகளுக்கு
கங்கை, யமுனை என
பெண்ணை புனிதப் படுத்தினான் !

அமெரிக்காவில் புயலுக்கு
கத்திரீனா, ரீடா
என்று பெண்ணின் பெயரை வைத்தான் !

பச்சை அட்டை வாங்கிய
அமெரிக்கா குடிப்போன
இந்திய குடிமகனை தேடுகிறாய் !
பச்சை வியர்வை சிந்தும்
பச்சை தமிழனை
மணவாளனாக ஏற்க மறுக்கின்றாய் !

நவ நாகரிகத்தை
உடையில் காட்டியவளே !
நவ நாகரிக நாட்டுக்கு
குடித்தனம் நடத்த நினைப்பவளே !
அன்னையின் அன்பை
அயல் நாட்டு மோகத்தில் மறந்தாய் !
பிறந்த வீடு , புகுந்த வீடு இரண்டும் இல்லாமல்
வேறு தேசம் குடி புகுந்தாய் !
வருடத்திற்கு ஒரு முறை
உன் பிள்ளைகளை
‘பேரன்’, ‘பேத்தி’ என்று சொல்லி
பெற்றோரிடம் காட்ட நினைக்கின்றாய் !

யாரும் ஆணையிடமாலே
உன் மணவாளனுடன்
உன்னை நீயே
நாடு கடத்திக் கொண்டாய் !

தேசம் தாண்டும் தமிழச்சியே
இறுதியாக ஒரு வேண்டுக் கொள்..!

தேசம் துறந்து சென்றவனுக்கு
உன்னை துறந்து செல்லாமல்
பார்த்துக் கொள் !!

'வசந்த வாசல் 2008 கவிதை தொகுப்பு' நூலில் நான் எழுதிய கவிதை.